見工是一場角力！重新思考最常見提問，如何增加成功機會又保住自我底線？

　　見工係一場互相角力嘅比賽，雙方宣傳自己同時，亦要保留自己底線。雖然面試官一方多數會以高姿態視人，而作為應徵者一方又不能因而被對方嚇親，要保持面試過程流暢，氣氛良好。另一方面，面試官會從多方面測試應徵者，就算你好想加入該公司成為佢哋一分子，但要必須收放自如，不能完全失去自己嘅底線。以下幾個常見提問，值得大家重新思考。

 

「請你介紹一下自己」

 

　　一條最簡單、好多人都唔太重視嘅問題，多數背稿式讀出早前準備嘅內容，但其實回答時都有少少技巧。作為面試首條問題，直接影響對方對你第一印象，要處理得宜，先要認清提問者對你有幾了解。多數較有系統嘅公司，首次面試都由HR部門負責，而佢哋早已熟讀你嘅CV，對你嘅學歷、工作經驗等等一定十分了解，先會決定offer面試。所以回答時毋須過分詳細重複CV上嘅資料，只需輕輕簡述就足夠，或者中間加插新內容同例子。簡略內容可以為面試後段預留更多時間，令節奏更輕鬆，而加入新例子能減少悶場嘅情況，令對方更專心。另一方面，介紹自己時要表現出你有好嘅說話技巧同演說能力，對你印象加深。

 

　　當HR完成首次面試後，「second in」多數會交由直屬上司或其他部門主管面試，自我介紹嘅做法就有少少唔同。好多時佢哋都未必細讀你嘅CV，只係透過HR嘅簡述對你略知一二，呢個情況以上資料反而變得重要，唔怕重複詳談。

 

「你願唔願意經常OT?」

 

　　呢條問題對香港打工仔嚟講有少少多此一問，因為喺香港工作加班係必然，不過面試官咁問，除咗係間接表達你知公司加班情況嚴重之外，另一方面亦試緊你底線。好多人會慣性回答「OT 我可以呀，以前公司都成日OT，而且我未結婚冇小朋友，可以OT的」，但其實就算你好想入呢間公司工作，回答時要為自己留一線，唔好冇咗自己。

 

　　當然好多時僱主一方會認定自己係莊、你係閒，而重點係雙方角力時所作出嘅取態。讓對方知你有自己嘅態度十分重要，「OT冇問題呀，但work life balance都緊要，所以我會努力工作，盡量令自己喺唔OT嘅情況下完成所有事情」。其實一面倒OT OT OT ，唔一定代表你勤力，老闆亦未必會欣賞，咁可能只代表你唔夠「腦力」，要諗諗公司係想買「你個腦」，定想買「你對手」。

 

　　不論打工仔還是老細，見工還是返工，都係講求「價值」，面試都唔例外。你要俾對方知你嘅價值所在，而且更要強調你仍在不斷升值中。同時間亦要發掘該公司嘅價值，令你真心想入呢間公司工作。最後做到雙贏嘅局面，減少錯配嘅情況發生。

 

　　（續）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情