【員工價值】公司冇咗你都得？學會成為職場「搶手貨」

　　「公司冇話冇咗邊個會唔會得」呢句說話間唔中都會聽到，可能老細冇講出口，但心中一定有呢個諗法，因為佢哋覺得大部分員工嘅價值，只在於一個金錢數字，而唔係能力。事實上部分員工如果離開，雖然唔會對公司長期構成好大影響，但都會令公司短期斷臂，所以老細對呢類員工都會留一手。如果你都想好似呢類員工咁唔怕俾老細炒魷魚，就要有以下嘅能力。

 

懂得建立獨特性

 

　　好多打工仔工作多年，都未必了解自己身處乜野位置，佢哋只會專注公司內嘅工作，而忽略自己喺整個市場上嘅發展。究竟現職公司喺行內係大、小公司、 自己人工喺內行高或低、對比行內自己係微塵定高層、相對地升得快定慢等等。所以就算你冇打算轉工，建議你間唔中都應該send 下CV，一年最少要有2-3次interview。除咗可以望下市況，了解下行內有幾多個「自己」，再從interview中了解自己嘅不足同埋「搶手度」有幾高。Review一下不同公司、高一個職級嘅job description，再對比一下多唔多人搵你interview、interview後有冇second in 等等，就會大約知道自己欠缺啲乜。

 

　　另一方面，喺同一個行業、相近嘅部門、職位、公司，都有唔同嘅job description，部分嘅要求可能相同，而不同嘅地方雖然未必係你現階段嘅工作範圍，不過往往呢啲好可能係你將來潛在嘅獨特性。建立你本身工作範圍以外、但又可以幫到公司嘅能力，提升你嘅搶手度，足以令你已經比其他同事值錢。

 

好嘅CV組合

 

　　先唔談及不同行業或公司嘅技能同際遇問題，要有一個好嘅CV組合，有兩個重點要注意。一，有數份工作經驗嘅同時，又唔會令人覺得你jumpy；二，每份工作都對自己仕途有一個獨特角色。

 

　　部分人會有一個錯覺，認為「轉工」＝「jumpy」，從而害怕轉工。當然成日跳槽唔太好，但一直唔跳槽亦唔代表係好事，工作經驗太單一，都係一個問題。其實現今社會轉變太快，喺同一公司工作多過十年嘅畫面已經較少見。如果以Marketing行內計算（先撇除唔想升職等退休嘅old seafood），較低職級嘅員工平均兩至三年轉工一次，中、高級約三至五年，如果喺以上數字之內，都稱不上好jumpy。間唔中八掛一下其他同事、上司上一份工作做咗幾耐，了解行業嘅生態，其實十分重要。

 

　　好多人搵工都係直觀地搵一份人工較高、有升職機會嘅工作，而忽略宏觀地分析CV整個組合嘅配搭。見過不少CV，工作十年，做過三、四間公司，但每份工作嘅內容近乎一樣，轉工只為加薪。以上例子大有人在，但假若你想提升自己價值，就要諗清楚新公司如何令自己「add value」。定下每份工作帶俾你嘅新經驗，除咗令你有一個好嘅CV組合之外，亦會比僱主覺得你有上進心，唔會只為錢看，整體感覺亦會加分。 

 

　　當然轉工、升職、加薪呢啲事情，係「七分努力，三分際遇」。努力工作，建立自己嘅獨特性，提升你嘅「搶手度」，再把握跳槽時機，建立一個好嘅CV組合，就能夠只有你炒老細，冇老細炒你。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票