【購物狂的鍊成】蠱惑的Marketing！營銷策略令你由「冇興趣」變「必買」

　　有冇諗過，自己購買一件產品時，其實有部分原因並非你真係需要或者鍾意呢件產品，而係「潛意識」驅使你去畀錢。有研究指，人嘅大部分行動，都受潛意識影響。喺整個購買過程中，消費者接收到不同嘅宣傳訊息，影響佢哋嘅消費潛意識，繼而左右佢哋嘅購買決定。

　　好多年前一份研究發現，消費者喺整個購買過程中，會從不同渠道接收宣傳訊息最少七次，最後先能夠作購買決定。呢七個訊息並非單單發生於商店之中，而事實係當你未認識產品時已經開始發生。由本身唔了解產品，到對同類產品感興趣，再去了解指定牌子嘅產品，最後畀錢，marketing都會喺整個過程中推送訊息，希望喺消費者腦袋中植入商品「記憶」。如果產品／品牌喺市場上較新的話，多數訊息會著重「了解」同「興趣」，其次先係「購買」。相反如果市場已經對產品／品牌有一定認識，訊息會偏重「購買」同「再購買」。

　　當Marketing安排呢七個訊息嘅內容方向時，通常都會針對消費者嘅購買原因，如價錢高低、產品功能、對品牌嘅信心等，希望改變佢哋睇法。例如Dyson吸塵機，佢哋從不同嘅宣傳渠道植入「用我哋嘅吸塵機，除咗係實用性嘅需要，更係一種必要嘅品味同時尚，而價錢嘅高低只係其次」嘅訊息，希望由「唔需要」變成「必要」。

　　另一方面，要做到由「唔需要」〉「想要」〉「需要」〉「必要」，植入訊息時如果能夠同消費者情緒掛勾，可以加深印象。例如可口可樂經常喺宣傳訊息上，將品牌同快樂掛勾，不時亦會推出廣告，將不同層面嘅快樂同產品聯上，加強「想要」同「需要」嘅訊息。希望令人諗起可樂，就會聯想到快樂，甚至係諗起快樂，就會聯想到可樂。

　　但現今digital marketing實在太快，以前「七次」嘅說法今日未必一定可行，因為短時間內多次接收訊息，可能對消費者嚟講係一種spam，所以而家嘅marketing會視乎行業同情況，多數會由七次變成三次，而內容方向會有更多層次，目標投放亦會更為精準，以減低spam嘅可能性。

　　好多沿用咗多年嘅marketing法則，雖然貌似古舊，但只要了解背後嘅骨幹，法則仍然歷久常新。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇