【搶佔先機】邊個話social media冇得搞？聰明人必學的三個「網絡生態」

　　Social media 嘅世界裏面，每年一小變，三年一大變，變嘅除咗係科技、平台、功能之外，用戶嘅習慣、網絡生態等等都變得好快。但好多人只著眼於平台嘅轉變，而忽略咗策略上同生態上嘅變化，從而錯失商機。

 

1.　循環周期 

 

 

　　其實好多事物都有自己嘅循環周期，好似80-90年代興啦叭褲、吊腳褲，之後耐不耐又會再次興起。媒體生態亦都係一樣，最初80-90年代，喺報紙同雜誌較為盛行，其後就到電視，所以初時大眾習慣睇文字為主，當年嘅廣告都好重視tagline同內容中所帶出嘅message。往後20－30年不斷轉變，由著重文字到圖片，再到短片、360短片、live 短片、AR/ VR、Story等等。

 

　　近年文字又再次受到重視，所以而家以長文章為主嘅social 平台都好受歡迎，就算文章過二、三千字，view數同engagement都好強，從而見到周期又循環到最初。

 

2.　3秒定律

 

 

　　大眾睇文章/ 廣告時，首三秒其實好重要，一來係因為讀者瀏覽三秒Facebook先會計一個view，二來係如果文章或者相片得唔夠好、頭幾秒內唔夠吸入正題的話，讀者就會對內容失去好奇心，從而唔會繼續睇落去，白白流失一個view。但近年因為網絡多咗長文章／ 長內容，所以「3秒定律」開始有少少轉變，有／無質素嘅讀者都慢慢突破咗呢3 秒，因為就算文案唔太吸引，但因為閱讀習慣嘅改變，大部份讀者都必定閱讀超過三秒，影響每個view嘅質素。

 

3.　明星化、KOL化、數字化

 

 

　　以前成日用「網紅」一詞，但到咗今日該名明星／ KOL係咪網絡紅人、而佢又紅唔紅，都好難分得清。因為而家所有明星都需要做網上宣傳，而網紅亦會參與電影拍攝同出席公開活動，有時甚至網紅嘅收入更遠超過明星。所以慢慢開始變成「明星KOL化」或者「KOL明星化」呢個現象。

 

　　除此之外，social media仲帶來一個方便，就係將明星「數字化」。以前大家討論一個明星紅唔紅，好多時都係「講feel」。可能你覺得成日上電視嘅藝人先叫做紅，但可能其他人會覺得拍電影先係明星，大家量度標準不一，好難對比。但社交媒體嘅出現，加上好多網絡工具配合，大家可以準確地計算到該明星喺social media上嘅粉絲數量及瀏覽人數，以統一嘅指標分析出明星知名度，繼而計算出用呢位明星嘅ROI，令知名度數字化。

 

　　好多年前曾經有位老細講過「social media冇得搞，呢類平台1-2年內就會消失」。其實平台本身只係一個工具，點樣用呢個工具、平台有乜野內容，先係重點。由冇到有，再變成主流，必定有佢成功嘅原因，而我哋就要搵出呢啲原因變成商機。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇