【搵工必睇】小薯唔識填Expected salary？　3招教你好好拿捏期望薪酬的定位

　　好多人搵工時都唔太清楚如何定expected salary，尤其係初出茅蘆嘅小薯，因為工作經驗尚淺，只能以朋友／同學為準則。但其實要好好拿捏expected salary嘅定位，都有好不同嘅方法同技巧。

 

 

了解行情

 

　　就算你冇轉工嘅念頭，都要養成多瀏覽求職網嘅習慣，一來可以了解行情，二來能夠了解自己career path上嘅不足，以改善自己未來嘅方向。

 

　　市場上有部分招聘廣告，會將人工貼於標題之上作招徠。當然，標題上嘅金額多數只係該職位最高薪金，唔一定代表你能夠得到，但係一個幾好嘅指標。如果招聘廣告無列明人工，你亦可以喺搜尋時，加入薪金下限，就能夠知道該職位大約嘅薪金。另一方面，多留意比你現職高一級職位嘅市況，亦能夠帶比你一啲升職嘅啟示。若然你能夠符合多間公司對你高一級嘅工作要求，代表著下次同老細review時，提出升職嘅成功率亦會較高。

 

 

還價空間

 

　　當你同新僱主喺interview後，雙方「情投意合」，去到「傾價錢」嘅階段時，通常會出現兩個情況。一，因為你嘅expected salary低於僱主嘅定價，所以對方一口答應。二，僱主不停還價，最後金額比你要求嘅為低。

 

　　其實當你了解解市價後，如果情況許可的話建議再預留多5%俾對方還價空間。不論以上邊一個情況都好， 還價空間能夠設立防守線，令你較易貼近你嘅目標薪金。如果你對自己有信心，還價空間可以調高一點，令自己更有利。 

 

　　另外，好多人習慣寫expected salary range 而唔寫一個實數，呢個做法並無對錯，但緊記一點，salary range唔好定得太闊。曾經有應徵者將expected salary range 設定$20,000-35,000，其實定得太闊反而會令對方覺得你「唔知價」，繼而可能會利用呢一點壓價。

 

　　建議salary range最好設定為10-15%，同時間當寫上salary range時就無需再寫「negotiable」等字眼， 因為呢一個range嘅下限已經代表你嘅底線，如果要再negotiate的話，salary range就變得無意義。

 

 

上手離職同事人工未能作準

 

　　試過有應徵者透過其他途徑得知上一任同事嘅薪金（$35,000），所以現職$20,000 嘅佢亦因為咁，而將目標薪金定為$35,000，建議盡量避免，因為成功機會係十分微。其實唔同人喺同一個職級，人工上可以好大分別。可能該職位起薪點為$25,000，當同事工作幾年，經過幾次加薪後先獲得$35,000人工，情況有別，只能參考，但不能作準。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動