【品牌的品格】抽水都要講Timing　要贏人就要掌握黃金24小時

　　曾經有人喺林日㬢 Facebook 留言「過咗廿四小時嘅水，唔准抽」。的確，頭兩三個鐘嘅抽水 post，可能會引起大眾會心微笑，但後來者再抽，只會顯得你人云亦云。

　　過去72小時，你喺 Facebook 見幾多個「任何仁」嘅抽水 post？你又見到幾多個品牌搵個藍色人，然後話「任何人都用 xxx 產品」。呢類抽水 post 只能證明品牌嘅 social media 團隊或者 agency 出圖夠快，但其實無咩創意或內容可言。

　　人有「人格」、報有「報格」、品牌都要有專屬嘅「品格」，大眾先會認得你，然後再睇下鍾唔鐘意你呢個品牌同產品。「品格」同人格一樣，都係靠言行日積月累而成。社交媒體就係而家最快、最直接畀大眾體現你「品格」嘅渠道。

　　美國連鎖快餐店 Wendy's 就以招積、「串嘴」個性走出自己鮮明「品格」。例如有人喺 Twitter 問佢「如果我屋企附近無 Wendy's，咁點算？」(If I don't have a Wendy's at my location, what do I do?）Wendy's 回咗一個字「搬」（Move）；又有人問「喺麥記，我應該叫咩？」（What should I get from McDonald's?）Wendy's 回覆「叫佢教你點去最近嘅 Wendy's 。」（Directions to the nearest Wendy's.）

　　Wendy's 就憑呢把賤嘴成功引起好多人嘅注意同轉載，繼續追睇佢 Twitter 之餘，甚至引起大家主動去「挑機」。原來「賤格」亦可以係「品格」。

　　呢篇文章出街之時，大家可能仲會睇到抽「任何仁」水嘅 post。相比星期一第一次見到呢啲 post，你嘅感覺有咩分別？你對呢啲品牌又有咩感覺？

　　如果做唔到抽水嘅先行者，其實無需要勉強，亦無需要執著於人有我有，或者覺得無抽到水，係「蝕咗」。今次抽「任何仁」水或者之後抽其他人水都唔會令你得到長久嘅 engagement。長久嘅 engagement 係你能夠創造另一個「任何仁」—— 敢於破格、敢於說服老細接受新事物，花時間、花精力、花創意做一個真正嘅先行者。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇