【Share staff新概念】去到邊做到邊！同時打幾份正職賺到盡！

　　早前喺一個講座中談及到「Millennials對未來嘅影響」，當中一個較為多人討論嘅話題就係「將來有好多打工仔嘅工作自由度會大大提高，能夠去到邊做到邊之餘，工作類型同僱用模式都會唔同晒。再加上喺Sharing Economy嘅概念底下，新一代嘅打工仔慢慢會變成『遊牧民族』，簡單啲講即係『Share Staff』」。呢個概念好似好新，聽落去未必人人接受，尤其係老細，佢哋唔明白「我畀錢請一位職員返嚟打工，又點能夠share呢？」

　　其實Sharing Economy呢個概念近年愈來愈流行，最多人認識嘅例子相信都係Airbnb同Uber，近年外國亦有marketer提出「Everything Airbnb and Uber」，覺得Sharing Economy除咗能夠物盡其用之外，亦能夠填補經濟上不同嘅缺口。當然，每當有新經濟體系嘅出現或改變，有贊成聲音嘅同時，必然亦會出現好多反對聲音，喺呢度先唔談及唔同國家和經濟之下嘅可行性、誰對誰錯等等嘅問題。但如果呢個Sharing Economy現象繼續向前走的話，Share Staff發生嘅機會都唔細。

　　我哋成日講嘅Millennials喺近年最有影響力嘅一群，而佢哋除咗不停改變緊自己嘅生活模式、消費模式外，就連工作習慣亦有所轉變。因為digital所帶來嘅方便，唔同賺錢嘅方法同機會都多咗。好多人放工後會做兼職，或者自己開網店，甚至會一邊去旅行一邊做公司嘅工作，或者做旅行代購等等。佢哋習慣一個人打幾份工，亦開始變得冇固定嘅工作地點，有電腦／電話喺手嘅時候，就係搵錢嘅時候。佢哋嘅目的就係想善用自己嘅時間，將自己不同嘅強項發揮到淋漓盡致，同時亦要令所以強項都能夠賺錢。

　　其實好多人都有多項才能，但如果只能夠屈於一間公司內，每日工作八小時以上都只能做一件事，技術上係無用盡呢位職員，所以Share Staff嘅概念就由此而產生。舉例，Toby佢係一位Youtuber、又有自己網店、間中做下model，而正職就做係平面設計師，雖然佢身兼4職，但其實Toby有3份工作都係放工或weekend先可以做，再唔係平日就要請假做兼職。到最後Toby可能會放棄正職或其他工作，因為咁而失去好多機會，老細亦冇咗個好員工。老細為咗留住呢個好員工，會以freelancer嘅形式錄用返Toby，因為係freelancer，所以返工時數同人工都會少咗，老細慳咗錢之餘，又做到本身要做嘅事情，老細同Toby都得到win-win局面。

　　將來繼續發展落去，愈來愈多老細接受錄用freelancer或「半職員工」（其實家下已經好常見），最後好多人會係幾間公司嘅正職「半職員工」，就算你唔識開網店、又唔想做Youtuber，但都可以名正言順有幾份正職，星期一返A公司，星期二返B公司，去到邊做到邊，呢個就係「Share Staff」嘅概念。

　　不論你係咪遊牧民族、或者你有冇多份正職都好，如果可以的話，搵出自己嘅才能將其發揮於工作之上，呢個先係工作嘅意義。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇