2019-12-19
【聖誕笑料】普天同慶派對趣談：對於運動，你的睇法是……
「親愛的聖誕老人：
今年請給我一個纖瘦的身體和一個肥美的銀行戶口，去年你調轉了，今年務必更正。謝謝！」
＊＊＊
聖誕Office Party，宿敵狹路相逢。
「嘿！詹士，乜你又肥咗！」肥佬一展開人身攻擊。
「哦！人老咗，個腦輸入多咗資訊，人就自然重咗啦。唔通你個腦愈嚟愈空咩？」肥佬二還拖。
「你個腦重、個身仲重。我就唔同咧，積極減肥，最近研究緊極限運動。」
「我都好鍾意極限運動，尤其是唔使我做。如果由我唔鍾意嘅人做，就更值得鼓勵！」
此時肥佬三上來打圓場：
「兩位喺度傾運動呀？有時我都擔心自己不斷向橫發展，不過有一招係萬試萬靈嘅！就係Happy Hour隊番兩杯，出嚟就覺得自己好靚仔架喇。」
＊＊＊
年輕人的聖誕派對。
「我舊年破費咗成千蚊，Join咗個Gym，一磅都冇減過。」
「點解？」
「原來要去嘅！」
＊＊＊
中年人聖誕聚會。
「長壽嘅秘訣就係每日行至少一萬步。」
「我阿爺六十歲時每日行5里路。」
「咁佢一定身體好咧。」
「係呀，佢而家75歲，仲好行得架。不過我哋而家唔知佢行咗去邊，打緊鑼搵佢。」
＊＊＊
老年人震吓震吓咁參加聖誕聚餐。
「好耐冇見，近來做乜？」
「做運動！」
「乜運動？」
「Getting over the hill（走下坡）囉。哈哈哈！」
＊＊＊
無論是吹水口部運動、真正身體運動或放肆胃部運動，都希望你有個充滿愉悅的Holiday Season！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇
