【2018黑材料不絕】鄭若驊僭建愈鬧愈大 北韓戰爭速戰速決？

　　今年真係勁爆年。

 

　　好意先生認為會有戰爭爆發，仲有黑材料爆出。

 

　　佢睇完上期預言後，有更精準嘅補充。

 

　　佢認為戰爭地點大熱係北韓，因為北字有兩把刀，再加埋戊戌年兩支㦸，真係刀光劍影。由於戈字收筆急速而有力，戰爭會速戰速決，迅雷不及掩耳。

 

　　「係殲滅性嘅，光速！」

 

　　至於時間，佢擔心係新曆4月15日至6月左右，因為農曆3月為丙辰月，與流年戊戌有辰戊相冲之象，而且有戊辰戌三重土，土厚埋金，佢預言：戰爭一旦爆發，或者即將爆發，肥仔金一係著草，一係龜隱。而美國應該等冬奧後郁手，突炸北韓，費事南北韓和解，佢D軍火冇著落！

 

　　狗年除咗有熊熊戰火，仲有黑黑材料。

 

　　黑材料又與戊戌年木盛有關。好意先生話立春八字同年初一嘅八字都係木多，木代表文件、資訊、報章。戌係火庫，以木為匙開正此庫，所以今年會有政壇猛人、娛樂紅人，社交名人等私隱大放送，真係惹得一身是火。

 

　　其實雞年冬至之後，黑材料已源源不絕出爐，又係與木字有關。

 

 

　　律政司司長鄭若驊嘅若字同驊字都有草花頭，丈夫潘樂陶嘅樂字又有木，一齊捲入僭建風波，愈鬧愈大。

 

　　另一位突然吸晴嘅女性係藝人藍潔瑛。被指責嘅係曾志偉，其實性侵傳言原來係2006年嘅舊事，當時一位韓女士提出指控，曾志偉興訟告佢誹謗勝訴。現在此陳年黑材料又被挖出嚟。女主角藍潔瑛嘅藍字同瑛都有草花頭，唔通又係木作怪？

 

　　好意先生結案陳詞，話黑材料會繼續嚟，可謂絕無冷場。狗年真係發狗仔隊，傳媒就大豐收，當事人就大風吹咧！

 

　　（希望好意先生滿意我今期專欄嘅「個人大碟」處理方法。佢仲有精彩預言，遲D爆。）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情