神州大地 賺錢要訣

　　有次唔識死，在國內搞PR Project，當時與合作單位仔細分工，在場地開會時，佢哋講到月咁圓，結果星昏月暗，無一兌現，仲好似從來未聽過咁，講工作就實則虛之（冇貨交）；講收費就虛則實之（無中生有）。好在我有兩手準備，否則認真樣衰！

 

　　或者嗰次係我唔好彩啦！相信國內近年來效率已大幅提升，否則經濟如何騰飛呢？不過賺大陸錢這口飯，實在不是人人可以吃的。

 

　　有位叻仔朋友阿益，係香港金牌Sales，未夠30歲，已經有車有樓有船有狗，後來心紅起來，北上創業，不過大業未成，錢已花了不少，幸好他也未算全軍盡墨，因為當時覺得濕濕碎投資咗嘅的士生意，竟然個個月有錢分，只是並非他理想中的大茶飯而巳。

 

　　對於中港兩地營商遊戲規則的差異，他有深入認識，亦深感操作不易。

 

　　阿益常說：與國內商人周旋如與豬共舞，說得更貼切，是同豬玩泥漿摔角！非常狼狽。他們一來滑不留手，二來濕滯麻煩，你輸是應該，贏都一身泥濘，慘勝！

 

 

　　國內人又好喜歡開會，無論國企民營高層，都愛在會上噴口水。阿益的口頭禪是：「佢哋開會多過共產黨！」當然啦，其中有些領導也真是共產黨員嘛。

 

　　開會有時是需要的，但國內有個奇妙的習慣，香港人多數講求效率，講好傾完就散水啦；大陸則喜歡校好時間，你準備留三日嘛，最初兩天半談的都是廢料，最後下午最後兩小時才見真章。呢啲唔知係乜招數？係想搵人陪過日辰？定係喺初段中段挫低你嘅銳氣，等你又急又謝，佢哋先畀你最低條件呢？

 

　　當然，神州大地並非都是麻煩人物，阿益在大陸混了多年，也遇過青年才俊和義氣仔女，只是無緣合作而已。

 

　　論阿益的相，其實已具備在大陸打拼的優勢：眼睛幼長，擅長睇位，鑑貌辨色，構建人脈、把握商機，都有一手；而且鼻長，即可以投資時間、資源，等待時機。

 

　　唯一破綻是眼神較露，有時難免鋒芒畢露，容易在不適當時機露了底，例如對有些人看不順眼，便會面色一沉；對有些事又不妥協，弄成僵局；有時又太心急表態，沒有迴轉餘地。

 

　　香港人在國內經商，最好眼神內歛，即忍得、搓得、磨得、混得、等得，結果咪賺得囉！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好