今年老闆生存之道

　　老細羊年面對雙重威脅：似野馬的員工、如猛虎的客戶。

 

 

　　是甚麼令你的世界變成動物奇觀呢？

 

　　還不是那些四化的星：

 

　　天機化祿：員工以為外面有景，搵工跳槽。

 

　　天梁化權：客戶自以為是，非常挑剔。

 

　　紫微化科：人人以為自己獨步武林、唯我獨尊。

 

　　太陰化忌：結果有人失業、有人失財、有人失客。

 

　　這組合會令打工仔蠢蠢欲動，又令客戶特別腌尖，管理層今年肯定比較辛苦。

 

　　如上期所言，員工一方面覺得自己份工冇乜發圍，一方面又似乎看見外面遍地黃金，或者認為自由可貴，想飛！

 

　　今年特別多人辭工去旅行唔返嚟，或者趁30歲前去working holiday，見識見識嘛！咁樣勞工市場已經唔見咗一批青春精英。

 

　　好咧。成熟精英又會被同業招手，誘以高職厚利，因為今年收購合併、換血活動頻繁，好多人要組班底，搵自己請嘅人入主新地盤。

 

　　所以嗰D有能力有經驗嘅人員，可以話走就走，不帶走一片雲彩，舊老細點留都冇用，惟有節哀順變。

 

　　至於客戶，亦有分道揚鑣之勢。

 

　　今年尤其是舊客戶，非常天梁化權，即判官手持權柄，丙到你暈，但做老細嘅一定要睇得開，講明老細，梗係客大你細啦!咁點算呢？

 

　　試舉一現實個案，以示範……化危為機的心法：

 

　　廣告公司靚女客戶經理被名牌大客不斷無理取鬧，一日衝入老細間房，含住眼淚訴苦，並擲下兩句便走了：

 

　　「一係你炒佢，一係我炒你！」

 

　　老闆深呼吸一下，打電話給名牌大客。

 

　　他被客戶鬧爆半小時後，說：

 

　　「我都知你好辛苦架咧，你老細真係唔容易應付！」

 

　　客戶沉默了兩秒，然後一聲長歎，說：

 

　　「唉！唔好提咧，得閒食飯傾啦。」

 

　　自此客戶似番個人！

 

　　奉勸老闆們，今年要常常心理輔導自己。員工如流水，有去又有來，不要動感情，不要鬧情緒。客戶如病人，有時會發作，要用同理心，明白他們都是俾人捽，才至變了瘋犬狂吠，記得用上乘EQ武功，化解舊客的來勢洶洶；又要睇住新客，小心財去匆匆。總之，今年做生意，心情要放輕鬆…鬆…

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇