新型冠狀病毒疫情大爆發發展至今已經一個月，回帶睇返，林鄭政府處理疫情方面嘅手法，同佢地處理修例風波可以話係一脈相承，得了教訓但毫無改進。舉個例子，林鄭喺新年過後去到2月8日先宣布由內地來港人士需要強制隔離，嗰陣開始先大大減低中港人流，但其實已經有確診個案懷疑係因為家人喺1月底多次頻繁返回內地而中招。如果林鄭早喺新年前已經果斷採取呢個「半封關」做法，好明顯呢個家庭多位成員唔會中招，香港嘅確診個案一定無今日咁多，等同當日林鄭早早講撤回而唔係堅持講「The bill is dead」，香港亦唔會虛耗至此。佢一個人嘅優柔寡斷，就係咁要市民埋單。

　　最慘嘅係，呢個咁無能嘅政府，一而再再而三咁都係浸淫喺自己嘅幻想入面，出到來就想轉移市民視線。喺市民想畀錢用「炒價」買盒口罩都要捱更抵夜、飢寒交逼咁排大半日之時，高官仲夠膽死出嚟話「疫情受控」，真心想問呢班「精英」，點樣為之受控？受控之下點解公務員唔使返工？點解市民出街打個邊爐都擔驚受怕？定係添馬艦入面疫情受控，所以高官口快快講得出咁唔負責任嘅說話！？

　　嚟緊就快公布新一年度財政預算案，建制泛民一面倒叫政府派錢，Tina聽聞林鄭、茂波到呢一刻都係好唔想行呢一步，但今鋪政治壓力真係唔細，依家最終會唔會全民派錢，暫時仲係五五波未有定案。但Tina想重申，就算林鄭茂波大發慈悲派錢，其實都只係派緊市民嘅錢，亦係搵市民埋單。搞到今時今日，由修例風波到抗疫行動，可謂步步行錯、步步失據，政府派錢，亦係因為庸官未有遠見，早著先機，先要派錢去掩飾自己嘅施政失誤。難怪最近風向急轉彎，唔少一直支持政府施政嘅喉舌都掉轉槍頭，睇嚟有人為失誤埋單下台係遲早嘅事。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票