就快新年，新年前立法會都休埋會，剛剛開始「一地兩檢」嘅立法程序開始進行，進入條例草案委員會審議階段，今日係第一次會議開鑼。睇咗一陣網上直播，認真嗰句，律政司司長鄭若驊好明顯就無運房局局長陳帆咁打得，答泛民嘅問題亦唔見得好有說服力，要靠陳帆幫佢護航，怕且司長往後條路都唔易行。

　　「一地兩檢」日後再跟進，下星期過完農曆新年返嚟之後，距離立法會補選嘅日子唔夠一個月，政壇焦點將會聚晒喺補選之上。有候選人被選舉主任DQ之後，雖然唔係兩個而只係一個，但普遍分析都認為，直選補選都係會由非建制派佔壓倒勝優勢，始終DQ會激化泛民支持者出嚟投票，以表示對政府嘅不滿。

　　今次選舉暴露咗兩個現有選舉法例之下非常嚴重，或者稱之為難以理解嘅問題。第一個就係關於DQ。DQ係由該選區嘅選舉主任落決定，而選舉主任一般都係由該選區嘅其中一位民政專員去負責，係有豐富行政經驗嘅公務員。呢位公務員雖然決定唔到邊個贏，但就要用佢嘅「政治智慧」，去決定邊個或者邊幾個一定無得贏，仲要係並無客觀標準去判斷，判死刑連上訴機會都無。

　　好喇，你DQ完人地之後，傳媒問你憑咩去DQ，你就唔答叫人問選舉管理委員會，到問選管會主席馮驊之時，佢又話DQ係由選舉主任決定，佢又無參與有關決定，「參選人可以選舉呈請」，真係互推推得一乾二淨。由選舉主任依據確認書去判斷候選人資格，好明顯畀咗一個好重要生殺大權畀選舉主任，但又無一個公平嘅制衡機制，同香港一直奉行嘅價值觀有好大出入。

　　另一個法例大問題就係有關選舉論壇嘅要求。根據法例，每一位候選人出席論壇都必須要受到公平對待，政治明星同政治素人一樣，說話時間要咁高咁大，除非候選人自己放棄。呢個「要求」就可能令到論壇變得不堪入目，唔好聽D真係乜嘢人都可以上電視，只要5萬蚊選舉按金，就可以穿梭各大小傳媒宣傳。難怪今次補選，據聞連大台無綫都破天荒唔搞論壇，Tina認為呢個真係明智之舉。呢個所謂嘅「公平對待」，認真係對觀眾唔公平，一定要搞搞佢！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇