「新官上任三把火」呢句諺語，我諗都唔夠用來形容新特首林鄭月娥；意思係，林鄭新官上任，但就肯定唔止得三把火，十把火都可能有。

　　第一把火就係關於香港最根本性嘅問題——房屋，搵咗運房局新局長陳帆打頭馬，諗緊將劏房合化法，由慈善團體去做合法劏房，希望畀一班等緊上公屋嘅人可以紓緩一下。

　　第二把火依家就喺財委會燒緊，申請增加36億元教育新資源撥款，今日正式開始傾，相信呢個「派糖」政策泛民都唔咁刁難，好快會過，充分體現新政府嘅效率。

　　至於第三把火，據聞林鄭下星期將會馬不停蹄會見不同社會人士，包括立法會各大政黨，就10月發表第一份《施政報告》進行「門面」諮詢。點解Tina會話係「門面」諮詢？真係對唔住都要講一句，由依家去到10月，三個月嘅時間去制訂《施政報告》，仲要預時間校對印刷，真係由今日開始都已經係接近終點線，林鄭一早就已經用鞭鞭策各政策局要交功課，所以呢份林鄭嘅第一份《施政報告》吸納到幾多民間智慧，大家都心知肚明，諮詢變得有幾門面亦都可想而知。

　　不過，門面還門面，工夫亦都要做足，據聞打頭炮獲得接見嘅就係工商大財團味最重嘅經民聯。至於點解揀經民聯行先，關唔關大主席係經民聯事？Tina不得而知，因為按常理推斷，林鄭要見無錯一定係見建制派先，但都應該先見下代表基層選民嘅民建聯、工聯會等以直選拎到議席為主嘅大政黨；但依家就先見偏晒向工商財團嘅經民聯，的確畀市民「林鄭更加尊重商界」嘅睇法，咁樣亦都唔多有利。

　　邊個先邊個後都好，林鄭真係貫徹佢嘅「好打得」形象；但幾打得都好，都要社會和諧、萬眾一心先可以執行到政策。執筆之時，剛剛收到四位非建制議員被DQ嘅消息，會唔會將林鄭上任後和諧嘅氣氛一舖清袋呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票