喺競選期間擔任林鄭月娥競選辦主任嘅行政會議成員陳智思一句「組班有如求人入火海」，道出林鄭喺組班過程之中面對嘅困難。

　　林鄭組班可有三方面嘅難關需要克服。第一關，係現任官員離巢潮。資深官場人士同Tina講，幾位現任官員，包括食衛局局長高永文、政制及事務局局長譚志源、律政司司長袁國強等，都唔會再喺下一屆政府效力，對林鄭組班帶嚟最致命嘅打擊。

　　「如果林鄭係一個好老細，你估呢班官員會唔會咁快話唔撈？唔好忘記，佢地好多個都仲係好後生，唔係唔得掂咁滿頭白髮呀！」官場人士一語道破。而多位現任官員嘅表態，令到官場以外，主要係商場內嘅傑出領袖，對於跳入火海更加係退避三舍，亦正正係陳智思所講嘅現況。

　　第二關，係來自CY。眾所周知，CY有幾名愛將喺現任政府，而據聞佢開到聲要林鄭「好好處理」愛將。但林鄭同CY唔同，林鄭係堅打得嘅官員，佢對下屬素來亦係有好高要求，唔係只求忠心，所以佢對部分CY愛將出現排斥狀態。CY公開否定林鄭提出撤銷小三TSA嘅要求；而CY貴為新任政協副主席，主要官員都要由阿爺任命，CY喺任命上有一定牙力，林鄭埋班亦要好好處理同CY之間嘅緊張關係。

　　第三關，係來自林鄭自己。林鄭對下屬要求之高，官場中無人不知，早排話鬧喊高官單花邊，官場中人都話，呢個係公開嘅秘密云云。揀人做局長，林鄭必定係精挑細選，但市場上又有幾多人，可以畀林鄭精挑呢？據聞有唔少有份量嘅「飛來蜢」向林鄭釋出做官意向，但呢批人，一係唔夠經驗、一係就唔夠能幹，林鄭揀得落手嘅一個起兩個止。特別係財政司司長呢個位，據聞係令林鄭最頭痕，幾位已蒲面嘅人選都唔係真命天子。而由於肯落火海嘅財金界人士少之又少，現任財庫局局長陳家強，雖然跟咗鬍鬚咁多年，最後亦可能過檔林鄭馬房。

　　林鄭埋班嘅「噩夢」，可能發到6月先完。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇