車禍後遺 鼻竇炎致面癱做手術 寶珮如最驚全身麻醉：擔心醒唔番

　　【晴報專訊】前亞視藝員寶珮如（Baby）近年再次活躍幕前，演出不少電影及劇集，又主持電台節目。一切看似順利，但1999年遇上的車禍，至今仍影響Baby的健康。意外令Baby毀容，臉骨鑲了鈦金屬片及螺絲，因她經常患鼻竇炎，鼻竇細菌藏在鈦金屬片中，感染三叉神經致面癱，要接受全身麻醉動手術。身體多年來經歷大大小小的痛苦，但Baby依然積極面對，更笑言上天對她不薄。

 

 

　　近年寶珮如有不少演藝作品，包括電影《藍天白雲》及《濁水漂流》；劇集則有下周首播的《換命真相》，以及剛拍畢的《痞子殿下》；最近又獲好友楊紹鴻邀請，拍檔主持港台節目《一起走過》。不過，99年遇上車禍導致下顎面骨盡碎毀容的Baby，多年來除了經歷多次手術，健康亦不時出現問題。今年初曾患上腕管綜合症的她，原來拍攝《痞子殿下》期間，因鼻竇細菌感染三叉神經而面癱，要動手術處理。

 

一度擔心中風

 

Baby今年八月做微創手術，處理面癱問題。（IG圖片）

 

　　Baby早前接受本報專訪時已完成手術，只見她相當精靈、對答如流，但久不久要暫停訪問，好讓她抹走從鼻孔流出的污穢鼻血。Baby說︰「其實鼻竇炎唔係一朝一夕嘅事，醫生話我係發咗霉嘅鼻竇！因為（車禍手術後）我塊面裏面有塊鈦金屬片，鑲晒螺絲，我之前成日鼻竇炎同傷風感冒，啲膿走唔到，有少少細菌感染就會藏喺（鈦金屬片）入面，結果搞到面癱。」她深深體會「病向淺中醫」的重要，若發現有小問題便要立即看醫生，「依家我嘅鼻甲下顎骨鑿咗兩個窿，呢兩個窿係畀我鈦金屬片壓住嘅鼻竇位置，將啲膿同邋遢嘢排出嚟，所以依家耐唔耐就突然流鼻血，呢個係正常反應。我求主耶穌保守，希望無事，大步檻過。」

 

Baby（右一）拍攝《痞子殿下》時健康出問題。（IG圖片）

 

　　當時正趕拍《痞子殿下》的Baby，完成所有戲份後才入院做手術，看似淡定對待，實質十分憂心，「嗰時面癱好緊急，我以為自己中風，因為拍戲時塊面無知覺、眼無知覺，刷牙食嘢都無知覺，以為個腦爆血管，但原來係鼻竇炎所致。」雖然醫生要她立即動手術，但她堅持先完成戲份。「我同醫生講我拍緊古裝劇唔做得（手術）住，因為手術後鼻裏面有好大嚿棉花，棉花會自行溶解，但溶解過程中有血同邋遢嘢流出嚟，如果要開工會好唔雅觀，所以拍完劇先做手術。」

 

上天對自己不薄

 

　　自從22年前經歷車禍以來，Baby曾多次接受手術，但她坦言今次再動手術有不少憂慮，「我好驚手術唔成功，因為要全身麻醉，我好怕全身麻醉，好驚會醒唔番…我99年撞車以來，都做過五、六次以上嘅全身麻醉，每次麻醉完，我嘅腦細胞都受影響，好多時都唔太集中到精神。」她笑言老公屬緊張派，見她拍古裝劇十分辛苦，加上面癱，擔心得叫她不要再拍劇，「但我對自己有信心，覺得上天對我不薄，仲可以留畀我一口氣，活到今日同埋做到鍾意嘅嘢，覺得耶穌會保守我，所以我同老公講唔使擔心，覺得『我得嘅！』」

 

　　樂天的Baby雖然手術前有憂慮，但很快一掃而空。「我就係咁，我係一個好開心嘅人，嗰一下有啲緊張、少少擔心，不過依家又無嘢。我希望唔好再做手術，雖然呢刻我把口講話好簡單，但其實手術後個鼻好痛，只係唔好嘅嘢我無講畀大家聽。所以希望唔使再做手術，可以開開心心過每一日、每一天、每一個小時、每一分鐘、每一秒，哈哈！」

 

感激袁潔儀大姐明

 

Baby與袁潔儀（右一）識於微時，Baby坦言對方的恩情一世還不完。（受訪者提供）

 

　　面對生命中曾遇上的不幸，Baby仍感恩做自己喜歡的事情、遇上另一半、有愛錫自己的摯友。「雖然當中過程係難過，好感恩認識到愛錫我嘅朋友，佢哋同步陪我行我嘅苦路，我做手術等如佢哋做手術咁；大家好擔心我嘅財政，因為好多手術費同生活費，當時差唔多係借錢度日。」她感激好友袁潔儀當年一出糧便分一半薪水給她，「好多謝袁潔儀姐姐，佢係我最最最美麗嘅天使，唔知點講，（恩情）一世還唔完，每食一口飯都會諗起佢；仲有大姐明（林建明）對我真係不離不棄，由我做新人嗰時同佢合作，到我出事之後，佢好似阿媽咁照顧我，我可以活到今日，好多謝我身邊呢啲摰愛。」

 

Baby感激大姐明待她如女兒般照顧。（受訪者提供）

 

轉載自: 晴報

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇