否認逼婚傳聞 李佳芯︰分手唔會得一個原因

　　【晴報專訊】李佳芯（Ali）與陳炳銓多年來愛得低調甜蜜，可惜兩人敵不過「七年之癢」，今年初分手收場。早前有傳Ali逼婚不遂致兩人分手，亦有傳回復單身的Ali獲富豪力追而搬入豪宅；不過Ali昨日出席活動時，一一否認傳聞，直認分手不是單一原因造成，又強調自己仍不是業主。

 

Ali透露將於十月開拍全新的愛情喜劇。

 

　　李佳芯、馮盈盈、陸永等昨日到荃灣宣傳劇集《智能愛人》，由於Ali已很久沒有出席商場的宣傳活動，因此獲大批粉絲到場支持。Ali受訪時不忘大讚fans乖︰「我不時都會同fans一齊做義工，曾經同佢哋一齊探訪視障、聽障同輕度弱智人士。（考慮成立慈善基金？）有機會嘅話當然希望，如果我可以憑個人嘅影響力去幫助更多人係好事。」

 

陳炳銓

 

　　另外，最近有報道指Ali因逼婚不遂，今年初與陳炳銓七年情斷，她解釋道︰「其實嗰次係出席一個美容代言活動，無諗到最後變咗以感情為主嘅封面。嗰啲內容都唔係我想要嘅嘢，一直以嚟感情事我唔會講太多，總之唔係因為結唔成婚而分手，可能個標題令到件事誇大咗；（分手）一定唔會得一個原因，總之我同佢嘅事我哋自己知囉。（之後再拍拖，你會唔會主動提出結婚？）其實呢個年代最重要係感覺啱，無話女仔就唔可以求婚，如果有對象、為將來好，邊個提出都無問題；如果大家有心行落去，呢個話題點都會講，最緊要係大家有共識，幾時達成就要講緣份。」

 

努力儲錢置業

 

Ali昨日獲大批粉絲到場支持。

 

　　早前亦有傳Ali獲富豪力追，遷入價值三千萬元的豪宅，她再解畫自己仍未做業主︰「其實我要求唔係好高，夠用夠住就得㗎啦，可能因為有幾次喺嗰度出入，大家就以為我住嗰度。多謝大家關心，為咗將來我會努力儲錢，令自己同屋企人有更好嘅生活；我都想買樓，但係搵錢真係好辛苦，要睇定啲先。」

 

轉載自: 晴報

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇