被《盛．舞者》參賽者熱血打動 錢嘉樂決心減30磅主演動作片

　　【晴報專訊】錢嘉樂主持的無綫選秀真人騷《盛•舞者》前晚播放決賽，嘉樂獲曾志偉及王祖藍邀請回港參與節目，想不到被一眾參賽者的鬥心所感動。重燃心中熱血之火的嘉樂，計劃努力減肥，希望趁自己有心有力之時，親身上陣自導自演動作片，重現昔日香港引以為傲的精彩特技。

 

錢嘉樂

 

　　錢嘉樂今次特地回港主持《盛•舞者》，除了應獎門人曾志偉邀請外，亦因節目甚有意義，拍攝期間更被一眾舞者喚醒心中的一團火。「雙方係互動，依家嘅年輕人只係差一個機會，社會的確係忽略跳舞嘅人，如果排舞排到去紅館都仲好啲，你都有啲收入；但街舞好自發性，享受完就唔計較酬勞，係幾難生存。當年紀大咗就要抉擇，究竟要生活定要理想？我喺咁多round睇到啲年輕人，我都被感動到。」

 

決賽表演霹靂舞

 

錢嘉樂84年曾參加跳舞大賽，他在前晚決賽中重演當年動作。（網上截圖）

 

　　《盛•舞者》播出嘉樂於1984年參加「第二屆全港霹靂舞大賽」的珍貴片段，他笑指節目監製曾希望他參與跳舞環節，但他表現抗拒：「一睇（片段）就知啲舞步過咗期，咁我就話唔好啦，跳得好就話，跳得唔好就似夾硬跳，好似一個『老鬼』着條hip hop褲喺度扮年輕人，覺得無咩意思，順其自然啦。不過呢個節目好自然帶動跳舞文化畀大家認識，我感覺到大家年輕嘅熱血，所以最尾唔多唔少都走唔甩。」結果前晚決賽中，嘉樂大跳當年難度甚高的舞步，只見他寶刀未老，獲全場舞者掌聲。

 

錢嘉樂拍攝期間，深受參賽舞者的熱血打動。

 

　　下月踏入56歲的嘉樂透露，希望趁身手仍然靈活時，親自上陣拍攝動作新片，「趁自己仲郁得，係咪要拍番套戲，想做一個香港嘅故仔，關於自己呢一行（武術指導）嘅。近排計劃畀個考驗自己，所以好想減30磅，我仲走咗去練翻筋斗，希望自己喺銀幕上做番一啲動作，帶畀觀眾一啲信息，呢啲都係受佢哋（《盛•舞者》參賽者）影響。」他笑言減肥不難，更重要是找回以前的自己：「以前好多危險動作，我諗都唔諗就去做，依家反而好似孭住幾個石油氣桶咁；為咗一個理想又好，為咗自己又好，既然以前得，點解要咁快放棄呢？（自導自演？）係，題材一定熱血，覺得要啱睇同有意義，香港人會有共鳴。」

 

《盛•舞者》前晚由Anisha（左三）勇奪冠軍。（IG圖片）

 

兩個女兒都似自己

 

留港工作的錢嘉樂，上月開心與妻女慶祝父親節。

 

　　難得今次較長時間留港工作，似乎最開心的是嘉樂太太湯盈盈及兩個寶貝女。嘉樂說：「盈盈幾緊張我啲工作喺邊度做，成日話最好留喺香港，但我唔介意周圍走。不過有時睇住個女長大係幾開心，呢年發覺小朋友大得好快，趁佢畀你錫時就陪多啲，大個咗有自己朋友就唔睬你。（兩個女兒誰最似你？）兩個都似，呢個答案最好，樣同性格各有各似！」

 

轉載自: 晴報

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇