「嘭！」成個核彈炸咗落來！話說噚晚有外國通訊社公開咗一段聲稱係特首林鄭月娥同一班商界fd子閉門傾計嘅錄音，入面林太好屈委咁話，如果可以佢都想辭職呀，家下修例風波，已經去到國家層面，佢做到嘅野Very, Very, Very Limited。仲哽咽咁講，修例風波以來冇去街，冇去Shopping Mall，又去唔到髮廊（Can't go to a hair salon）……皆因黑衫人會捕佢咁話!

 

 

 

消失的「譴責」

 

　　絕密錄音流出喎！仲講到辭職下台喎！行家同Jenny一於趁行會前去問清楚！今日特首辦真係墟冚呀！中外記者都齊晒！據小妹觀察，林太今日行出來表情望落寬容過之前，仲留意到今日林太講開場白語速比往常快，好似有少少緊張咁噃！

 

　　話咁快就講完開場白，咦！咪住！咪住！咪住！有個指定詞語冇出現過，次次都會聽到，但今朝竟然冇、出、現、過！就係－－「譴責(Condemn)」呢兩個字喇！（小妹事後再聽多次！都真係冇講啊！）

 

　　咁又係，林太次次出親嚟幾乎都畀人問「除咗無限譴責，仲會做乜嘢呢？」嗱！而家政府就做嘢喇！雖然講咗好多次今次反修例運動冇「大台」，但好似政府中人都唔多信，總之覺得你係「大台」，有啲知名度，一於拉晒你班「反中亂港」嘅人返差館先！至於檢控係由林太個難姊難妹律政司長鄭若驊揸旗，告唔告得入？已經係後話啦！Right？

 

與其捉「鬼」不如諗計

 

　　Jenny望望下，唔知係咪真係冇得去Salon搞到冇補染髮，定成日諗野諗太多喇，林太鬢角竟然有些白髮啊！哎吔！Jenny都係女人，當然明白冇得去Shopping扮靚，簡直比死更難受。之不過小妹覺得，呢排香港咁多野發生，林太應該將全副心機放咗喺諗點拆局喇掛？唔通推波畀返中央處理咩！香港「一國兩制」㗎麻！

 

　　至於邊個係流出錄音嘅「鬼」，聽林太口氣就唔似想再嘥心機去捉喇，但Jenny就聽聞係一個都幾有頭有面嘅人物！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇