【極權腦細】IT部採取「保安措施」禁上網！打工仔應勇敢對抗歪理

　　有睇開呢個專欄嘅讀者都知，早前我公司多位同事因為城市熱話，沉迷社交媒體，搞到畀老細詐型，公開出口訓話。唔知係咪呢件事啟發到佢，突然以「保護公司資料」為由，召集IT部精英開大會，商討咗一系列嘅清場大法！平心而論，雖然我明白好多公司都有唔同嘅保安措施，但從未畀人監管過嘅我哋，突然之間要變成籠中鳥，自然更加官迫民反！你哋公司，又有冇以下千奇百趣嘅清場方法？

 

 

「無謂」網站，NO！

 

　　「無謂」呢個字好主觀，但大家一睇就知老細擺明針對罪惡之首Facebook等社交媒體。小氣嘅方丈為咗唔畀大家再用辦公時間嚟娛樂，叫IT 一次過 block晒所有社交媒體嘅Access，即係只要你經公司network瀏覽Facebook、Instagram、twitter、whatsapp、各forum等等社交媒體及通訊網站，就會去左「Error 404 not found」網頁。同樣，就算你用手機，連公司Wifi上上述網站，一樣會出現404 。但係，公司未變態到可以地區性限制所有流動裝置，所以你仲可以用你本人嘅流動數據上網，成為同外界接觸嘅唯一方法。迫到大家急急腳要upgrade手機上網plan。

 

 

「實用」網站，NO！

 

　　你Ban我與公事冇關嘅網站都仲講得通，但勢估唔到連一啲做嘢時必須用到嘅網站都Ban埋。始終，返工好多時需要同external嘅人合作。當attachment太大，爆左email attachment大小上限時，自然會將資料upload上share drive，等對方自己上drive download所需文件。但一系列share drive platform如sendspace、google drive、dropbox、baidu等等下刪一千個，全部都被block了！最終我地只可以將attachment拆件send出！大佬，咁點做嘢啊？淨係做嘢都已經忙到死啦，而家仲要花額外時間處理日常唔需要處理嘅事！係咪搞到自己搞到人先？

 

 

　　我唔知腦細個獨裁心癮有幾嚴重，但有腦的人都會諗到，除非你係金融行業，否則咁高security用於其他低風險行業只會令公司上下效率更低。明白用權勢威迫人民時心情的確幾舒暢，但下次想約束我哋時，真係要諗一諗會唔會帶嚟負面效果，唔好人做你又做！我亦唔知呢場IT 攻防戰幾時先完，我只知道腦細將大家拉入困難之中。道路，只有2條：選出代表同腦細開心見誠討論利弊；或者大家舉兵反抗腦細呢個一意孤行嘅決定。覺得你有道理嘅，不妨企出嚟為自己抗爭！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇