【職場生存之道】以為佢提攜你？不如睇吓自己有冇「中陰招」！

　　好多新入職嘅小薯，大呻返新工冇人帶住，要自己慢慢摸，唔知做緊咩，仲話好羨慕其他有人帶住嘅新薯！雖然我公司一向都會安排senior去照顧新同事，費事佢地做錯嘢時，要執手尾仲衰，但其實遇到賤格senior，基本上你搵定新工都得！今次事件，新薯分分鐘因為senior一個命令畀人炒！

　　事緣新薯Kitty跟住senior Sally處理一個project，內容原本係用傾好嘅材料A，但因為供應問題，畀唔到材料A佢地，對方就提議用更靚嘅材料B去做，而費用亦維持不變。大家都知道香港打工仔因為whatsapp嘅出現，已經變咗24小時on work mode。所以大家off hour傾project細節時，有時都會用whatsapp去落決定，而Project負責人Sally見到有靚料又唔駛加錢，咁大隻蛤乸隨街跳？緊係去馬啦！但佢就私下叫Kitty係個group度回人地：「OK」。鑊，就係咁製造出嚟！

　　原來公司企硬一定要用材料A，甚麼「傳統最重要」、「人情嘅味道」，總之老闆就堅持要材料A啦！而家製造商比材料B公司，大粒嘢即時反枱，話要告製造商違約喎！但⋯唔好唔記得，新嚟的小薯受命，代表公司應承咗對方！你告人違約時，人地都可以告你反口！雙方就執住「whatsapp對話有冇法律效用」嚟互相攻擊！而Sally作為呢個project嘅負責人，緊係將所有責任推哂落新薯身上，向上司投訴Kitty唔跟從上司指令，代表公司隨便做決定，搞咗個大頭佛出嚟！老闆仲公開表明，如果單官司輸咗，一定要炒Kitty！

　　新薯Kitty係唔知嘅情況下，被奸人擺上枱，佢仲喊哂咁同其他同事解釋自己只係跟Sally order做嘢。其實用吓腦都知，一個新人點敢衝出嚟對外應承一啲佢決定唔到嘅嘢。但你要知，請一個係人都可以取代嘅新薯有幾易，冇咗你根本對公司冇影響；但假如揸正嚟做，怪罪落個senior身上，跟緊嘅project冇人接手，又較難請到高級少少嘅職位，對公司嘅影響就大好多！所以就算知道背後黑手係Sally，公司都只會聽Sally嗰套，怪罪落新薯身上。老實講，新薯根本冇辦法避免跟到衰上司，就算被屈，都只可以認命。要怪，就怪自己出身係商業社會，個人價值定奪公平對錯。所以致全港所有小薯：努力增值自己，為過去的不公義爭返口氣！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇