大鑊！開會先嚟急…點算？

　　返工最慘唔係多嘢做，而係多嘢做但又冇機會畀你坐定定做！點解？咪就係失驚無神畀人召集咗去開會囉！需知道作為食物鏈最低層，開會呢啲嘢你從來都冇Say，永遠只有你就上司Schedule！有一早約好時間地點當然最好，起碼畀你安排時間同準備。但總有種會議要你隨傳隨到，突然十萬火急要你衝入會議室幫手。呢個時候，個肚又唔生性，抽住抽住搞肚痛，入到會議室，你會點做？ 

 

　　公司文化好鍾意開開下會加人，原因？講到阿姐唔熟嘅話題，咪畀啲機會下屬喺其他管理層面前表現下囉。今次輪到同事Janice中招！跟據我同Janice閒談健康生活話題，佢習慣每朝飲一大杯暖鹽水，返到公司再飲自家榨果汁做早餐，一聽就知清腸胃之選！

 

　　事件發生於某日早上10點半左右，正是大家（偷偷）嘆完早餐，準備開工嘅時間。Janice突然收到阿姐Whatsapp「Please Come to Room B」，Janice不以為然，因為阿姐不嬲派功課都係用Whatsapp叫人去搵佢，咁Janice咪淨係帶支筆同帶張紙就行入房，點知一開門… 

 

　　「我搵咗個精英嚟幫手！呢個好幫手叫Janice呀，之後落嚟佢會為我地詳細講解呢PART架啦！」 

 

　　「吓？哈哈，咩嚟架？」 

 

　　「MARKETING D IDEA呀！你有份諗㗎嘛」 

 

　　「ER..Lily諗㗎喎？」 

 

　　「照PRE啦，冇所謂。」 

 

　　之後，Janice唯有頂硬上，將人生中第一次見到的Powerpoint向一眾膠層詳細講解。呢個Present考急才之餘，仲要考埋忍耐力，冇錯，Janice係呢個時候搞肚痛。一早飲果杯暖水打掃完腸道污物之後開始湧入膀胱，同時杯鮮榨果汁嘅纖維又不停進擊佢腸道。簡單嚟講，即係大又急，細又急，同時要集中精神用一秒時間速讀每頁Powerpoint，防止係大粒上司面前失禮（失禮阿姐），仲要集中精力收緊佢個括約肌！最終事情發生成點，Janice冇詳細同我講，我諗，佢唔想再提起果幾十分鐘生不如死，徒步由小溪行去激流嘅回憶。不過，佢就好語重心長同我講，下次失驚無神比人召喚，記得做好3個準備！

 

　　第一，千祈唔好怕人哋等，最好係門口「裝裝」有咩人，預計今次比人召喚幾耐，之後緊係考慮下使唔使去解放先。第二，千祈唔好貪靚，除咗擺係公司成年冇洗果件保暖衫，因為會議室預咗畀啲Full Suit人開會，冷氣自然開到有咁大得咁大，到時唔夠暖，凍到個人係咁震，失禮唔緊要，最驚又係凍到急！你明的！冬天特別易急！最後，千祈唔好漏帶電話，原因唔係怕Miss咗有人搵你，而係個會到有咩冬瓜豆腐唔明或唔識答，可以搵番相關同事求救！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好