開工利是 唔想逗都迫你去逗

　　新年假期話咁快就過咗去，打工仔除咗要面對假期後開工的現實外，還要開始長達兩個月沒有公眾假期的2、3月。不過，新年後返工終究還有唯一的好處，就是向上司逗開工利是。不管開工利是有多「細封」，相信大家都不會抗拒，最多只是私底下痛罵上司「孤寒」。（本人收過最細封的開工利是，是由直屬阿姐給的，只有$20，而阿姐直屬下屬只有5人，齊頭一百，真係少到麥當當都唔夠錢買！）

 

 

　　但是，筆者身邊有朋友在日資公司工作，卻反而對於逗開工利是一事十分厭惡。了解前都知道日資公司福利一向不錯，但規則和階級觀念又重又多。不過，有錢收都會唔Like？一於約朋友食飯問個明白！

 

 

　　「話就話日本公司，但香港區個老細不知幾赤化！成日學埋中國咁要好意頭，迫我哋啲做細嘅開工嗰日又舞獅、又跳舞，由樓下Lobby跳到上Boss房先比開工利是！」

 

　　「吓？咁咪成幢大廈嘅人都見到？」

 

　　「係呀！佢要睇跳舞，其實由公司門口跳入佢房咪夠囉！點解要人哋喺大廈門口跳上去？大佬呀，其他公司啲人日日行出行入、撞口撞面，比佢哋見到以後仲洗喺大廈門口行嘅？」

 

　　「同埋其實佢坐喺房等你哋，都睇唔到你哋喺樓下Lobby舞獅、跳舞㗎啦⋯⋯」

 

　　「佢要威呀嘛！所有舞獅同排舞都要我地自己抽時間出嚟練習同排舞㗎！跳得唔好老細鬧呀姐、呀姐又鬧我哋！搞到我哋新年放假都要抽時間出嚟排舞囉！」朋友愈講愈嬲。

 

 

　　「排舞當蝕畀佢，本來合埋眼，舞獅、跳舞十分鐘過咗去就算，當做小丑囉～最慘係，呀姐會揀Team入面青春啲、靚啲嘅女仔打頭陣入去講恭賀說話。一個二個棟喺度畀阿姐揀，個畫面你知唔知似咩？似小姐呀！比媽咪揀去拎手袋行街嗰啲呀！我好地地打份文職工，點解會覺得自己做緊舞小姐？個感覺有幾難受、幾侮辱你知唔知？」

 

　　「咁⋯封開工利是靚仔咪算囉，當大家互相恭賀下，心理會唔會好過啲呀？」

 

　　「封開工利得果100蚊，我畀番你，你唔好要我搞咁多嘢好過啦！」

 

　　突然，覺得原來阿姐都待我不薄，那$20開工利是逗得十分輕鬆。雖然金額略細，但至少不費吹灰之力就可賺到；相反，友人的開工利是多成5倍，卻要額外付出時間和精神。其實工作上都一樣，總是「你睇我好，我睇你好」，認為別人的工作較輕鬆、較多好處。有時靜下來看清楚每件事，你會發現自己擁有的，其實並不是太差。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好