2020-08-12
《Online有話兒》俄國向菲供疫苗，杜特爾特話第一個接種！
全球疫情持續，我哋香港呢邊月初仲日日過百，呢幾日先至話回穩返DD。另一邊廂，戰鬥民族俄羅斯已經話有疫苗推出，總統普京個女都已經接種埋；而呢一批疫苗據講會供應畀菲律賓，菲國總統杜特爾特講到明話疫苗來到佢打先，咁霸氣？！
（Shutterstock圖片）
俄國疫苗已推出，取名為「Sputnik V」
（Shutterstock圖片）
俄國人被叫得做戰鬥民族，幾時都係咁「沙膽」，批疫苗剛剛推出，總統普京就已經命人幫佢個女接種，其實只係想平民百姓安心啲咁解。呢隻疫苗取名為「Sputnik V」，跟美蘇當年冷戰時老蘇第一顆人造衛星同名，話冇「晒冷」都冇人信啦！預計可以喺9月量產，10月開始大規模接種。
之不過，大家對於疫苗嘅安全仍有所保留，原因係疫苗未完成所有臨床測試，雖然話當地有幾百人已經測試過，暫時未有不良反應，但第三階段臨床都未做好，大家都係有D擔心；不過話分兩頭，第三階段臨床要做起上嚟，快嘅都要半年幾個月，慢嘅要三幾年不等；眼下疫情嚴峻，加上行船解纜要爭先，提早推出亦無可厚非。
疫苗將供菲律賓，杜特爾特話自己要打先！
（Shutterstock圖片）
隻疫苗已經註冊，但大家都仲係有Ｄ疑惑。呢個時候，菲律賓總統杜特爾特就衝出嚟話：
「隻疫苗到貨時，我就會公眾面前打一支，第一個就搵我做試驗啦！對於我嚟講無咩大不了。如果疫苗對我有效，即係所有人都可以開始接種。」
菲律賓咁捧場真係好難得，所以俄國一早預備好，向菲律賓提供疫苗之外，仲會喺馬尼拉投資生產，話晒都係Friend子，有好嘢梗係益你先啦係咪！
美國衛生部長：安全更緊要
（Shutterstock圖片）
地球嘅另一邊，美國眼見對家咁快生產好，唔知係咪唔頂得頸而眼紅人，當地衛生部長阿扎爾就質疑啦：
「重點並唔係首先研發出疫苗，而是要擁有對全世界人民安全而有效嘅疫苗。」
咁你又無錯嘅，畢竟要打入身體入面。美國自己本身都有６款疫苗正在研發當中，希望年底前可以推出。不過美俄之間嘅明鬥暗鬥都鬥咗幾十年啦，從坦克鬥到上太空，而家連生物科技都要鬥埋一份。噢！救人要緊，比賽第二啊！
撰文：李皆穎
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇
