《Online有話兒》博爾頓新書爆大鑊　侵侵好頭痕！

 　　前美國國安顧問博爾頓(John Bolton)新書《事發的房間︰ 白宮回憶錄》今日出爐，呢本書搞到滿城風雨，大爆特爆侵侵（特朗普）過去所做嘅「秘聞」，包括佢點樣求習主席保佢連任，以及點樣同金仔（金正恩）對話，唔怪得侵侵之前急住出禁制令啦！

 

（Shutterstock圖片)

侵侵要求習主席幫佢手連任

 

（Shutterstock圖片)

　　新書入面講到，侵侵2018年尾參加G20國峰會時候，侵侵同習主席見過一次面，席間侵侵突然暗示中國經濟實力強大，請求習主席出手保佢連任，如果中國可以向美國增加採購大豆同小麥就Very Good啦！因為想當年侵侵獲勝都係因為班農民Fans幫助極大！

　　不過當時談及中美貿易細節時，習主席引用一戰及二戰歷史作例，講到明中國唔會簽訂不平等條約，暗示中國如果受到污辱，中國人民都會反美！

 

特金會：金仔問博爾頓「你覺得可以信我嗎？」

 

（Shutterstock圖片)

　　2018年「特金會」嗰陣，全世界都睇實，因為當時雙方期望不一，美國要求北韓完全無核化，但北韓希望可以分階段棄核。博爾頓曾經提議過以「利比亞模式」解決朝鮮核問題，即「先棄核，後補償」，不過金仔又點會肯放過你呢？

　　喺會談期間，話題轉談過博爾頓提及嘅「利比亞模式」，因為佢擔心如果答應「階段性棄核」會成為政治籌碼，不過侵侵講笑話博爾頓以前好強硬，相信而家態度會軟化；突然金仔話題一轉，問博爾頓：「我知道有啲難答，但你覺得可以信任我嗎？」

　　博爾頓當堂耍太極：「如果侵侵信任你（金仔），我哋就以此作為起點邁進。」

侵侵唔知英國有核武，問過荷蘭屬唔屬於俄羅斯？

 

（Shutterstock圖片)

　　博爾頓不下數十次大鬧特朗普無知成性，2018年侵侵與時任英國首相文翠珊會面時，有個官員提到英國屬於核武國家，而侵侵就接話：「哦？原來你哋係核武國家？」事實係，英國係繼美國同前蘇聯之後，第三個擁有核武嘅國家，侵侵真係Old News is so ......

　　書中描述嘅侵侵出醜，就梗係唔止一次，侵侵曾經前往過芬蘭首都赫爾辛基，預備同「戰鬥民族」之首普京會面，據稱侵侵曾經問過：「芬蘭係唔係俄羅斯嘅衛星城市？」佢又覺得，侵侵份人好長氣，經常喺簡報會上發表好多偉論係同個會無關。　

　　呢本新書可以話係核彈級資訊炸落美國政壇，民主黨仲唔日提夜提？

 

　　雖然白宮曾經申請過禁制令，希望阻止博爾頓呢本新書面世，但遭到法院駁回；不過法院都認為博爾頓「一直是玩命」，且有機會面臨刑事檢控。點都好，我會買多兩盤花生先慢慢嘆。

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇