上周四(4日)港大民研同一啲贊助既傳媒機構公布既立法會選舉最新既滾動民意調查。結果公布之後，政圈中人，無論係左中右都真係嚇咗一跳。

　　最令人嘩然既，係九龍西經民聯梁美芬，民調支持度竟然足夠佢帶埋名單第二個入立法會。競爭都非常激烈既港島區，調查顯示新民黨葉劉淑儀又可以帶多個入局。珍盈唔敢話兩位現任議員號召力唔夠，做唔到機場跑道畀名單第二位起飛，但比例代表制由回歸發展到依家，無論係建制定係泛民，政治光譜都打到散晒，任何一邊要一條隊贏夠票帶多個入局真係非常困難。睇返上屆數據，葉劉淑儀得票剛剛過3萬張，得票率9.16%；梁美芬得票率好啲，有14.89%。兩位女將要帶人入局真係談何容易?所以唔少政圈中人對呢個民調都抱有懷疑態度。

　　民調由港大民意研究中心做，理應係做慣做熟，但點解出嚟條數令咁多人有疑問?睇返細數，民調各區取樣率大多都係得百幾人左右，亦由於取樣率低，誤差率亦相對較高。所以，呢個滾動民調真係等到佢滾到有返咁上下大，先會有足夠參考性。

　　不過，就算取樣率夠多，大家都未必要過分認真。只不過係兩個月前既英國「脫歐」公投，各大機構在投票前所做既民調，留歐既平均率係54%，遠遠拋離「脫歐」既46%，所以正式公投之前，大家都坐定粒六，英國一定會「留歐」，股市係公投之前先至會造好。但最終得出嚟既結果，脫歐以51.9%跑出，同民調係完全相反。係現今資訊咁泛濫既年代，選民隨時都唔認真回覆民調問題，賽前民調又會有幾多成真呢?無論民調入面係贏家定係輸家，都唔好咁認真，努力做返候選人應該做既嘢啦!

*編者按:

立法會九龍西選區候選名單包括:譚國僑、梁美芬、狄志遠、游蕙禎、黃碧雲、劉小麗、蔣麗芸、李泳漢、朱韶洪、毛孟靜、黃毓民、何志光、關新偉、林依麗、吳文遠。

立法會港島區候選名單包括:鄭錦滿、許智峰、葉劉淑儀、郭偉強、張國鈞、羅冠聰、司馬文、王維基、陳淑莊、沈志超、黃梓謙、劉嘉鴻、何秀蘭、詹培忠、徐子見、賴綺雯。

(名單只列出排名首位參選者姓名)

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情