當一個人冇安全感，佢會搵另一個人俾安全感佢。

 

　　當一個政權冇安全感，會令全國家嘅人都驚恐，當人人都驚，個政權就可以獨享安全感。

 

　　銅鑼灣書店事件峰迴路轉，自去年十月開始被大陸扣查的店長林榮基，原本喺上星期四要將存入書店讀者資料的硬碟，帶返大陸交俾「執法部門」，但係佢表示，喺九龍塘港鐵站落咗車，思緒紊亂之下，食咗三支煙。

 

　　點都估唔到，呢三支煙對香港嘅歷史進程會起到關鍵作用，促使林榮基決定開記者會，一五一十將被拘禁過程向全港交代。點解係歷史進程？其實香港人對於有人開記者會已經係幾近「狼來了」，尤其是呢幾年，先有已經瑯璫入獄嘅發夢熊、潛逃外地嘅上海仔開唔成記者會爆大鑊，死極唔斷氣嘅亞視，同埋雷聲大雨點小嘅朱幼麟，就舉行令唔少花生友失望嘅記者會。林榮基呢個記者會就終於係真材實料，話俾香港人聽，真‧記者會究竟係點樣！

 

　　林榮基清楚交待喺深圳過關後即被拉嘅過程，亦「暢所欲言」，任問唔嬲。我覺得最緊要嘅係，佢同返上大陸前，係同一個人，但個位未被「帶上」大陸、喺香港同記者講明唔會返大陸嘅李波，就已經被消失咗，「偷波轉鳳」。所以我到而家仍然相信李波（未返大陸之前嗰個）。

 

　　同呂波、張志平，甚至自爆姓胡嘅林榮基女友一樣，當一個人被困於一個籠牢之中，身不由己，被困者固然值得同情，但係大陸一而再再而三用同一套方法，以「升到」通報機制，極速尋找到幾位人士講幾乎同一番說話，點解大陸政府仲會覺得香港人會相信？烏坎村嘅事例，可能帶俾香港一啲啟示。　

 

　　烏坎村民選村委會主任林祖戀號召村民上訪，抗議政府多年來一直壓逼村民，以貪污等形式奪取村地，原定星期二到鎮政府上訪。到上周末，幾百武警兵臨村口，挾走咗林祖戀。之後，政府用返同一套相似嘅劇本，拍片、逼供，林祖戀坐喺鏡頭前緩慢讀出自己嘅罪狀，就係「收賄」，而且佢亦都承認自己干犯此罪。

 

　　「香港而家只係一條大啲嘅烏坎村。」早幾日聽電台，聽到有聽眾講呢句嘢。我覺得係一個侮辱，侮辱咗烏坎村嘅村民。

 

　　當全村領袖林祖戀號召大家一齊捍衞村嘅利益，村民會團結一齊對抗政府。當林祖戀被捉走，村民繼承捍衛條村。當政府指林祖戀承認收賄，村民係以常識判斷，根本冇可能係咁樣發生，堅持上訪。

 

　　香港呢？親中派別一開始已經唔願意相信林榮基，更多嘅人係漠不關心，即使已經兵臨城下，但仍然係每日食玩瞓算數，或者認為香港咁細小，發揮唔到影響力。烏坎村民的大團結，相較於佷多香港人的小城心態，老實講，有啲痛心。

 

　　香港至今仍然係一個正常社會，但呢一種正常正係一步步被蠶食，真相已經擺在眼前，你仲會唔會做鴕鳥？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇