當Daniel遇上中菜軒的Hello Kitty

　　話說留學英國的日裔少女 Hello Kitty (K)，之前落戶香港開了全球首間以自己做主題的中菜廳「中菜軒」，重遇男友 Dear Daniel(D)。

　　D: 吉蒂，你今次有乜搞作啊？

　　K: 呢間中菜廳，我籌備咗超過一年㗎喇，主打一家大細都啱食嘅中菜，同埋鼓勵有機健康飲食。

　　K: 好似呢個頭盤「古法小食三味」，有用七味粉代替椒鹽做嘅「七味豆腐」，炆到軟淋先炸嘅「脆皮牛展」，同埋方便老人家進食而用紫菜代替茄子皮嘅「紫菜蒸茄子」咁，就啱哂一家人食喇。

　　D: 咁呢碟「蒸糕包」，係咪譯音自「Jingle Bell」？好多你個樣呀！

 

　　K: 話哂我都係留學英國，個菜名都嚟個中西 crossover 先！呢度嘅蓮蓉包、馬拉糕同蝦餃係由入廚超過四十年的大廚主理，班師傅學足超過半年，先做到我個貓樣咁似㗎。

 

　　D: 個湯呢？

　　K: 呢個咪滋潤湯水「杏汁白肺湯」囉，你知我好著重健康㗎啦，完全冇落味精，你飲多啲個人都冇咁 dry！

　　K: (繼續講) 至於呢味「笑哈蝦趣味」，有師傅用本地食材做嘅「豉油王煎大蝦」、「百花釀油條」同「XO醬炒蝦球」，你試吓。 

　　D: (邊吃邊講) Um……我鍾意食「XO醬炒蝦球」，蝦彈牙，蜜糖豆撈埋呢個自家製的XO醬惹味！

 

　　K: 咁我考吓你喇，你仲記唔記得我最鍾意食咩？

 

　　D: Errrrrrrr....(流冷汗中）

　　K: 冇心肝！係我媽咪做嘅蘋果批呀，所以呢味「咕嚕肉」，我叫咗大廚特別加咗蘋果肉，等我可以一啖蘋果，一啖豬肉咁食！

　　D: 我一時唔記得之嘛……(儍笑地抓頭頂的頭髮) 咁呢碟咁香嘅「炸子雞」，一睇就知係用本地鮮雞，同我一樣皮下脂肪少吖嘛，「上皮」上得幾靚喎。

 

　　K: 算你識貨 (得戚狀) ！ 

 

　　D: 嘩，咁呢味你又做乜做咗黃面婆？

　　K: 叫人黃面婆……呢個「蘋果雞絲飯」係用蛋黃炒飯，配我最鍾意食嘅蘋果同酸甜雞絲，我隻眼同貓鬚分別係用黑豆同茄子皮做㗎！

 

　　D: 又真係幾似你個貓樣嘅！啊……我醒起之前上網睇過有個單身男仔一支公嚟食飯，感觸到喊起上嚟嘅故事，原來就係呢碟飯！咁除咗「豆腐火腩飯」，你呢碟都可以叫做「男人的浪漫」喇。

 

　　K: 哼，唔係你估！食埋呢個「杏仁茶」仲浪漫呀，裏面有一塊我嗰樣嘅啫喱，愈食碗杏仁茶會愈變色，係咪好有心思？

　　D: (邊喝邊講) 直頭甜到入心啦！^^

「Hello Kitty 中菜軒」

地址 : 廣東道332-338號利來洋樓A至C地舖  

電話 : 8202 8203 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情