07/11/2018
10個女人9個感興趣的事：如何秘密查看男人的手機？
周末閨密飯聚，是夜話題由人妻F提供：「你哋有無懷疑過，發明用指紋解鎖嗰個係女人嚟？以前想check老公電話成日要偷睇佢撳密碼，而家慳返！趁佢瞓覺拎佢個電話嚟印一印就開到。」
天啊！這個年頭的女人真不簡單，憑著一點小聰明，科技盲也可以找到破案關鍵。
但前提是，為何要偷看他的電話？是有甚麼東西令人生疑嗎？
「無㗎，基本上佢日日放咗工都係返屋企食飯，間中都會自己一個人落街跑步，但應該唔會運動look出去偷食呱！但係有得check當然睇緊啲好，睇吓佢近來同咩人來往最多。你知嗎？有時你見到個名叫Eric就以為一定係男人，其實真身可能係Erica都唔定，所以點都係check埋短訊內容穩陣啲……」F說。
Read more：戀愛NG行為：明知會破壞信任關係，伴侶手機還是忍不住偷看？
夫妻之間說好的信任呢？沒有半點蛛絲馬跡，才努力去找出破綻，自從跟她在一起之後，他這輩子都成了嫌疑犯。
另一位朋友說：「你就好啦！我老公淨係用密碼解鎖，但我估極都唔中。有時臨瞓都仲見佢同人whatsapp，但又查唔出係邊個。」
「你又望唔到係邊個，咁肯定佢哋用whatsapp？所有可以send Private Message嘅apps都有可能㗎，我聽過有人會用Carousell扮買賣嚟聯絡，所以check電話一定要好徹底，所有social media同email固然要啦，另外做交易都唔可以放過，仲要睇吓佢payme會俾錢乜嘢人。」F用專家口脗回答。
我想不通，F到底是用怎麼樣的心情來進行「調查」。高興，當然是因為一無所獲；傷心失望，是因為終於證實了自己的疑心病是有根據嗎？說不信任這個人，並不是因為他不可信，而是出於她的好奇心，與及這世俗對男人應有的基本質疑，公平嗎？
F說：「如果佢想睇我電話，我都可以俾佢睇㗎，反正我光明正大；調返轉，佢如果無嘢，點解介意我睇佢電話先？」
她說的對，光明正大自然不擔心會被搜查，怕的人就是心虛了。只不過，行事磊落，卻被看成嫌疑犯，多少缺了點尊重。
「兩夫妻之間係唔應該有秘密㗎，唔係唔尊重佢，我用我嘅方式去了解佢多啲啫！」
我無言了。
怪不得後來科研人員又再努力研發Face ID和種種人臉辨識技術了。套用F的說法，後來那些具備感測器掃描、要求使用者在睜眼狀態下作「立體識別」才能解鎖的手機，想必都是鬼竄男人的傑作了！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【etnet 30周年】多重慶祝活動一浪接一浪，好禮連環賞！ ► 即睇詳情
