與謝賢60年後再合作 馮寶寶想申請健力士紀錄

　　【晴報專訊】童星出身的馮寶寶（Bobo姐），前年難得「出山」，與謝賢（四哥）相隔60年後再合作，接拍林家棟監製的電影《殺出個黃昏》。身在馬來西亞檳城的Bobo姐，日前以視像方式接受傳媒訪問，笑言想將今次合作申請健力士世界紀錄，「邊有演員隔咗咁耐仲可以健康咁合作，仲未死！」

 

馮寶寶在疫情下甚少外出，幸好屋企夠大，閒時到露台種菜打發時間。

 

　　現年66歲的馮寶寶，五歲時首次與謝賢合作拍劇飾演父女，所以她親切地稱呼對方做「四哥Daddy」。「今次再見四哥，佢依然腰身挺直，手臂同胸肌都無下垂，好結實，行出嚟既剪影依然咁有型，佢唔係單純貪靚，佢話佢一生人只做過一樣工作，佢要對得住呢份職業，一定要保持好身形，先對得住觀眾，令我對佢有多一份尊敬。」她表示和四哥屬同一年代的演員，卻又不是同輩，今次陪四哥再跑一圈十分難得，「我同家棟講，可唔可以申請健力士世界紀錄，好少可兩個演員隔咗60年可以健康咁合作，仲要係男女主角。」

 

馮寶寶大讚「爸爸」謝賢的手臂及胸肌依然堅挺。

 

大騷《92黑玫瑰》掌門鈴

 

馮寶寶感恩遇上監製林家棟，笑言若早20年認識對方，自己的演技將更進一步。

 

　　戲中，Bobo姐與「新抱」賈曉晨有場婆熄大戰，現實中育有兩名兒子的Bobo姐斬釘截鐵表示︰「相信我現實中唔會遇到，希望我個仔識揀！」她解釋︰「既然個新抱唔識得尊重我，咁不如我避開，如果我個仔鍾意呢個新抱，我無謂傷感情，亦唔想離間個仔嘅夫妻關係。」談到監製家棟有意開拍前傳，Bobo姐搞笑指不用找女演員扮後生版︰「如果電影菲林可以美圖修圖，我就可以演！（叫家棟化老妝一齊演情侶？）呢個提議非常好，真心話，點解我28歲就要演呂方媽咪同葉童媽咪呢？若果再有機會拍戲，我都希望靚靚咁見人。」

 

馮寶寶曬出「掌門鈴」，重現《92黑玫瑰對黑玫瑰》的經典情節。（網上截圖）

 

　　今次Bobo姐在大馬家中以Zoom受訪，訪問時突然展示跟經典電影《92黑玫瑰對黑玫瑰》中一樣的「掌門鈴」。「呢個掌門鈴係我去旅行時買，我第一次視像訪問，其實都唔知係乜，仲特登整咗個好靚嘅tea set喺枱面，同埋擺呢個鈴做裝飾，點知鏡頭要咁近影住我，真係乜紋都睇晒。」

 

轉載自: 晴報

• 

【etnet 30周年】多重慶祝活動一浪接一浪，好禮連環賞！ ► 即睇詳情