新片喊到眼乾 吳君如爆女兒一秒出鏡費100蚊

　　【晴報專訊】吳君如監製及主演的電影《媽媽的神奇小子》將於下月上映，電影由殘奥徑賽金牌得主蘇樺偉的真人真事改編，飾演蘇媽媽的君如，自爆拍攝多場感情戲讓她哭至眼乾；君如又透露女兒陳是知為電影客串了一秒鏡頭，自己封了100元利市給囡囡當出鏡費，更笑言下部戲會安排一句對白給她。

 

君如與梁仲恆在片中飾演母子。

 

　　吳君如、梁仲恆、蘇樺偉母子等昨日到銅鑼灣出席電影展覽及慈善義賣的開幕剪綵，並即場為粉絲簽書，君如的女兒陳是知亦有現身支持。

 

　　君如在展覽中細看劇照，令她憶起許多拍攝時的辛酸，心情有點激動，她表示電影拍攝時十分辛苦，而片中有不少感情戲，君如笑言自己喊到變「乾眼症」，當時導演更提議她若然喊不出就要滴眼藥水，她說︰「畀佢咁講，我已經笑到喊，即刻roll機！我睇咗部戲嘅前期版本，但完整版想留番同蘇樺偉母子一齊睇。我個女都未睇，所以打算成家人再一齊入場感受下呢套戲嘅振奮。」

 

同囡囡相處似朋友

 

君如女兒（左）和姪女低調現身撐場。

 

　　談到女兒可有見過她戲中感性的一面？君如笑言現實上鬧囡囡的時候很感性，她解釋︰「如果次次惡過佢，佢會唔聽你講，同埋唔好講嘢重複多過三次，蘇媽有句金句『唔好鵝牌雞記』，即係唔好依依哦哦，講嘢雞啄唔斷。我都叫佢有咩唔開心就同我講，唔好自己解決。」君如指女兒不算反叛，彼此關係就如朋友一樣。而女兒昨日罕有現身，君如笑稱是威逼囡囡到場買書支持，事關今次是慈善活動，能夠幫助傷殘協會，非常有意義。

 

　　另外，君如又透露女兒和姪女為電影客串了一秒，演出與梁仲恆擦肩而過的鏡頭，君如笑說︰「姪女嘅表演慾大過個女，但佢貪得意，想感受下媽媽拍戲嘅感覺，我都有封番100蚊利市畀佢。同埋我叫佢畀心機，下一部戲安排一句對白畀佢，哈哈！」

 

轉載自: 晴報

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票